ILOILO – Wala makaluwas ang mag-iloy nga residente sang Barangay San Vicente, Leganes, Iloilo matapos nakuryente sa sulod sang ila nga balay.
Ang mga biktima amo si Mary Jane Navarro, 48, kag 5 ka tuig nga agot nga anak nga babayi.
Sa interview sang Bombo Radyo kay Police Captain Roy Tayona, hepe sang Leganes Municipal Police Station, iya ginpahayag nga nagapahuway ang mag-iloy sa sulod sang ila balay sang nag-igrab ang electric wire sang street light kag nahulog sa ila atop.
Tuyo sang iloy nga lantawon kun ano ang natabo apang nasandad siya sa kusina samtang ginakungkong ang iya nga anak.
Ang halayan nga nasandaran sang iloy ang nagaangot man sa atop kun sa diin nagtupa ang electric wire.
Suno naman kay Dioscoro Panes, bayaw sang biktima, iya ginpahayag nga gintinguhaan pa sang iloy nga ihaboy ang iya anak agud indi mapuruhan.
Nagtupa ang bata sa kanal kag nagaginhawa pa suno kay Panes rason nga gindala sa ospital apang iya gin-alegar nga ginbalibaran sang Metro Iloilo Hospital and Medical Center, Inc. kag sang West Visayas State University Medical Center bangud puno na ang pasilidad.
Sa Western Visayas Medical Center nadala ang biktima kag gindeklarar man nga wala na sang kabuhi.
