UAE – Emosyonal ang isa ka iloy matapos nga naka-abot na sa Pilipinas ang abo sang iya nurse nga anak nga napatay bangud sa Coronavirus Disease 2019 (COVID-19) sa United Arab Emirates.
Sa interview sang Bombo Radyo kay Heide Jimenea, iloy sang Ilonggo frontliner nga si Marlon Jimenea, iya ginpahayag nga sang nakaligad nga adlaw lang sang nag-abot sa syudad sang Iloilo ang abo sang iya anak.
Suno kay Jimenea, makapila ka beses nga nagpangayo sila sang bulig sa gobyerno sang Pilipinas apang kasubong nga wala sang aktu.
Ginpahayag ni Jimenea nga kun wala sila naggasto sang masobra sa P30,000, wala gid natigayon nga madala sa Pilipinas ang abo sang iya anak.
Bangud sa sirkumstansya nga natabo, ginpahayag sang natungdan nga nagdesisyon ang tiayon ni Marlon nga magpauli sa Pilipinas agud diri na lang magpangabuhi kaupod sang ila anak.
Apisar sang kasakit, ginpahayag sang iloy nga nagapakabakod ang ila pamilya agud malapuwasan ang pagpanghangkat.
