BAROTAC VIEJO, ILOILO – Ang pagpalangga sa iya kabataan kag ang himpit nga pagsalig sa Ginuo ang nangin salandigan sang isa ka iloy nga makapila ka beses nga ginluiban sang iya bana nga isa ka suldado.
Maluha-luha nga ginsaysay sa Bombo Radyo ni Rosie Songcuya, tumandok sang Brgy. San Lucas, Barotac Viejo, Iloilo, ang iya mapa-it nga inagyan sa pagpangabuhi kag sa patag sang paghigugma.
Ginpahayag ni Songcuya nga ang iya bana amo ang iya childhood friend kag naga-isahanon nga nobyo.
Bangud nga nagdaku sa konserbatibo nga pamilya, ginpahayag ni Songcuya nga luyag niya kun tani nga magtrabaho sa Metro Manila ukon sa luwas sang pungsod apang wala siya ginpahanugutan sang iya ginikanan.
Nag-umpisa ang ila love story sang nagkitaay sila nga duha sa syudad sang Iloilo sa wala ginalauman nga kahigayunan.
Bangud nga wala man sang problema sa iya ginikanan kag nahulog naman ang iya buot sa lalaki, ila nadesisyonan nga magpakasal matapos ang pila ka bulan nga pagpakigrelasyon sa lamharon nga edad.
Sa ila nga pag-upod bilang mag-asawa, ginpahayag ni Songcuya nga masami sila nga nagasaylo-saylo sa lugar kun sa diin ang ssignment sang iya bana ukon nagapauli sa Barotac Viejo.
Didto na nag-umpisa ang pagpangbabayi sang iya bana apang sa una suno kay Songcuya, makapila pa niya ka beses nga ginpasaylo ang iya bana.
Samtang nagaligad ang mga inadlaw, iya nadesisyonan nga magbulag na lang sa iya bana kag magpaninguha agud nga masaguran ang ila apat ka mga anak.
Naagyan man niya nga magtrabaho sa Metro Manila agud nga makasupot sang kwarta nga iya pagagamiton sa pagtrabaho sa iban nga pungsod apang napatay ang iya amay rason nga nagpauli siya sa ila balay sa Barotac Viejo.
Masakit man para sa iya bilang iloy nga bayaan ang iya mga anak apang ini ang iya nakita nga paagi agud nga makapangita sang palangitan-an.
Bangud sa kasubo nga iya nabatyagan, ginpahayag sang natungdan nga indi man malikawan nga iya naisipan ang mga mala-in nga butang.
Sa pihak sang mga pagpanghangkat sa iya kabuhi, iya nga gindayon ang pagtrabaho sa Malaysia sang liwat nga nahatagan sang kahigayunan nga makatrabaho sa abroad.
Tuman naman ang pagpasalamat ni Songcuya bangud nga mabuot ang iya mga employeer sa sulod sang walo ka tuig niya nga pagtrabaho.
Sa pihak sang iya kasakit nga inagyan sa luyo sang iya bana, nagapabilin sa gihapon nga mabakod si Songcuya ilabi pa na ang iya mga kabataan ang yara naman sa estable nga pangabuhi.
