Nagpa-Bombo ang isa ka iloy matapos nga napriso ang anak sini nga domestic helper kag ginpasalig sang kapulisan sang Kuwait nga ipa-deport apang tubtob subong, wala pa ini nga macontact.
Ang domestic helper amo si Maricris Lapatero Sacatin, residente sang Poblacion, San Rafael,Iloilo, kasado kag may duha kabataan, kag 13 na ka tuig nga nagaubra sa luwas sang pungsod sa isa lang ka amo.
Sa interview sang Bombo Radyo kay Emellie Lapatero, iloy ni Maricris, iya ginpahayag nga ang employer sini ang nagapanag-iya sang isa ka catering services sa sulod na sang duha ka tuig apang wala ini sang nagakaigo nga permit rason nga gindakop sila sang kapulisan.
Ginpahayag nga nakaguwa ang amo sini apang nabilin sa sulod si Maricris kag ang kaupod sini nga Pinay.
Dugang pa sang natungdan nga ginkuhaan na sila sang iya amo sang abogado kag napamatbatan na sila sang korte kag nakatalana kuntani nga ipa-deport apang sang tion nga nagbisita ang iya employer, wala ginpagwa sang kapulisan si Sacatin kag gintudlo sa iban nga police station.
Ulihi nga naka-contact si Sacatin sa iya bana sang Enero 25 kag natingala ang iloy sini kun ngaa madugay ini nga wala maka-contact sa iya rason nga nagpakig-angot ang bana ni Maricris sa amo sini kag didto nalang nahibaluan ang natabo.
Dako naman ang pagkabalaka sang iya himata bangud luyag lang nila nga mahibaluan ang kahimtangan ni Maricris.
Nakapadulong naman ang mga ini sa Department of Migrant Workers (DMW) kag Overseas Workers Welfare Administration (OWWA) apang padayon ini nga nagapanawagan sa gobyerno sang Pilipinas agud mapadali ang proseso nga mapapauli ini.
