ILOILO CITY- Ginpa- Bombo sang isa ka iloy ang ginapahayag nga pagpamulitika sa ila nga rason kun ngaa wala ginpili ang iya bata nga magtiglawas sang ila barangay para sa Miss SK (Sangguniang Kabataan) Molo apisar ini ang ginkoronahan nga Miss San Juan sa Molo, Iloilo City.
Sa interview sang Bombo Radyo kay alyas “Maymay”, iloy sang kandidata, iya ginpahayag nga nakibot na lamang siya sang ginpahibalo ini nga wala malakip ang iya nga anak sa opisyal nga mga kandidata sa nasambit nga pageant.
Suno sa iloy, natingala ini bangud humalin sang una, nakaandan na nga kon sin-o ang ginkoronahan nga Miss San Juan amo ang ipadala sa Miss SK Molo.
Sang namangkot ini sa organizer sang Miss San Juan, wala man ini sang nakuha nga bastante nga paathag kag nagsiling lang nga wala ini sang sarang nga mahimo bangud ang SK chairman ang nagpili sang representative.
Nagapati ang natungdan nga pulitika ang rason bangud supporter ni Mayor Jerry Treñas ang SK Chairman samtang supporter naman ni Congresswoman Julienne Baronda ang organizer sang Miss San Juan.
Ginpahayag man sang iloy nga isa man sa rason amo ang nahanungod sa isyu nga wala ini gin-imbitar sang organizer ang SK Chairman sa amo nga pageant sang Hunyo 13.
Suno sa iloy, kuntani wala lang gindalahig ang iya bata kun may yara sang indi paghangpanay sa tunga sang SK Chairman kag organizer bangud wala man sang labot ang iya anak sa pulitika.
Samtang, sa official statement naman nga gin-isyu sang Sangguniang Kabataan sang San Juan nga ginapamunuan ni SK Chairman Pepito John Dumayao, gin-athag sini nga wala sang kaangtanan ang Sangguniang Kabataan sang San Juan sa Miss San Juan.
Suno sa statement, ang Miss San Juan ang lain man sa Miss SK- San Juan kag lain-lain ang organizers.
Dugang pa sini nga subong tuig, wala nakahiwat sang Miss SK San Juan.
Nabutang man nga ang makoronahan bilang Miss San Juan ang wala nagakahulugan nga itiglawas sini ang Brgy. San Juan sa Bb. SK-Molo.
Nanindugan man ang SK San Juan nga yara sila sa posisyon nga magpili sang kandidata nga amo ang magatiglawas sang mga pamatan-on sang ila barangay.
