GUIMARAS – Pagpangamuyo kag pagsalig sa Ginuo ang ginsandigan sang isa ka iloy agud nga malampuwasan ang epekto sang ginapahayag paghiwit sa iya bangud lamang sa kahisa.
Sa Good Morning Philippines program, wala napunggan sang iloy nga nagpahinago lang sa pangalan nga Mary Jane sang Guimaras, ang pagtulo sang iya luha samtang ginasaysay ang kabudlay nga iya naagyan kag kun paano niya nalampuwasan ang pagpanghangkat sa iya kabuhi.
Suno kay Mary Jane, masobra na sa 20 ka tuig ang nakaligad sang iya naagyan ang amat-amat nga pagkadunot sang iya kamot, tiil kag guya bangud sa hiwit.
Ginpahayag ni Mary Jane nga tuman ka budlay sang iya pagginawi sa sulod sang ginabanta anum ka bulan bangud nga nagadugo ang iya kamot kag tiil sa tion nga maghulag kag magpamwersa.
Nagpakonsulta siya sa doktor suno kay Mary Jane apang leprosy ukon aro lang ang findings sa iya ginabatyag rason nga nagpabulong siya sa manugbulong ukon suruhano.
Ginpahayag sang suruhano nga hiwit ang gintunaan sang iya nga pag-antos sa diin may nakuha ang manugbotbot nga mga dagum, bato kag bagul sang tawo gikan sa iya mga pilas.
Magluwas diri, ginpahayag sang iloy nga sa tion sang pagpangadi, kasubong nga ginasakit kag ginakuga siya ilabi na kun iya na nga isambit ang tinaga nga panulay.
Sa sulod sang pila ka bulan, iya lang nga gintuman ang tanan nga panugyan sang suruhano tubtub nga nag-ayo siya.
Sa pihak sang iya naagyan, ginpahayag sang natungdan nga wala siya sang plano nga magbalos sa tawo nga naghiwit sa iya bangud nga iya na lang nga ginatugyan sa Ginuo ang tanan.
Matapos ang iya pag-ayo, ginpahayag ni Mary Jane nga iya pa nga naka-istorya ang nagpahiwit sa iya apang wala sang komprontasyon nga natabo.
Wala nagdugay, ang ugangan nga lalaki sang nagpahiwit sa iya ang nag-antos man sang kasubong sa iya naagyan.
