ILOILO CITY – Dalayawon ang ginhimo sang isa ka solo parent agud mabuhi ang iya anom ka mga kabataan.
Sa interview sang Bombo Radyo kay Chona Amaguin-Alger, residente sang Barangay Infante, Molo, Iloilo City, iya ginpahayag napatay sa balatian nga rheumatic heart disease ang iya bana sang tuig 2011.
Suno kay Alger, kinahanglan sini nga magsulod sa nagkalain-lain nga mga trabaho agud mabuhi ang iya pamilya.
Lakip sa mga nangin trabaho sini amo ang pagka-labandera, pagbaligya sa carinderia, kag nangin empleyado sa water refilling station.
Apisar nga naga-isahanon nga nagpadako sang iya mga anak, manami ang relasyon ni Alger sa iya mga anak.
Ginpahayag dugang sang natungdan nga nakatutok na lamang ini sa iya mga anak, kag wala na nagaplano pa nga magsulod sa isa ka relasyon bangud para sa iya, mas importante ang iya mga kabataan kun ipanggid sa iya love life.
