Sang kasagsagan sang Covid-19, indi halos magduot ang aton kamot sa iban nga mga tawo sa kahadlok nga maglapta ang virus. Dumduman mo pa ang tion nga may mga plastic barrier sa jeep kag halos duha ka face mask ang suksukon mo sa kada adlaw?
Sa India, may isa ka tumalagsahon nga kaso sang Covid-19 paranoia kun sa diin tatlo ka tuig gid nga gin-lock sang isa ka iloy ang iya kaugalingon kag ang iya anak nga lalaki sa ila balay sa kahadlok nga mapatay sila sa Covid-19 kun maguwa sila sa ila nga puluy-an sa city of Gurugram, south-west sang New Delhi.
Ginapahayag nga 7-anyos pa lamang ang anak sang nag-umpisa ang Covid-19, kag lakip man anay ang mister sa gin-lock sang misis nga si Mrs. Majhi, 33.
Sang naghalog na ang lockdown restrictions, nagpamilit ang bana nga isa ka engineer nga maguwa bangud maga-trabaho na ini, apang sang nagguwa ini sa balay, indi na ini pagpabalikon sang iya misis.
Bangud sini, napilitan ang bana nga mag-renta na lamang sang apartment apang nagpabilin ang kahangawa sini sa iya misis kag anak gani nga nagadala siya gihapon sang pagkaon sa guwa sang balay kag siya man ang nagabayad sang utility bills.
Sang ulihi, subong lang nga Pebrero, nanugid na ini sa pulis agud may makabulig sa iya asawa kag anak.
Sang nag-responde ang pulis, nakit-an nga puno sang nagatangkas nga basura kag mga wala-tuo nga drawings sang bata ang balay.
Ginpahayag nga wala man sang ihibalo ang mga kasilingan nga gin-isolate ni Mrs. Majhi ang iya kaugalingon kag ang iya anak. Gindala na sila nga duha sa psychiatric ward para sa treatment kag nagalaum naman ang bana nga makabalik sa normal ang ila nga kabuhi. ##
