AJUY, ILOILO – Nadulaan na sang pagsalig ang iloy sang biktima nga gintiro-patay sang mga kapulisan sa ginapahayag checkpoint nga natabo sa Zerrudo, Sara, Iloilo sa mga kapulisan.
Ang biktima amo si Adonis Hontiveros sang Panantan Elizalde, Ajuy, Iloilo.
Samtang ang tatlo naman ka mga pulis nga ginatudlo responsable sa kamatayon ni Hontiveros amo sanday Patrolman Christopher Paclibar, Police Corporal John Michael Parsia kag Police Corporal Alfredo Bartulo.
Sa interview sang Bombo Radyo kay Celda Hontiveros, iloy sang biktima, iya ginpahayag nga indi magpa-areglo ang pamilya sa diin may isa ka babaye nga nag-istorya sa iya kag nagtanyag nga pa-eskwelahon ang iya mga kabataan kag hatagan siya sang palangabuhian.
Suno kay Celda, wala sang areglo nga may matabo bangud desidido siya nga magpasaka sang kaso batuk sa tatlo ka mga pulis.
Dako nga kadulaan si Adonis sa pamilya bangud siya ang nagaserbe breadwinner kag nagabulig sa pagpa-eskwela sang iya mga utod.
Pahayag pa niya, hustisya ang luyag nga maangkon sang pamilya Hontiveros.
Una na nga ginpahayag sang iloy sang biktima nga santu sa panaysayon sang isa sa mga nakakita, nagasunod ang motorsiklo ni Adonis sa angkar-angkar sang tatlo ka mga pulis nga ginapahayag naghalin sa Concepcion, Iloilo sa diin natigayon ang isa ka buybust operation.
Indi man mapat-od sang iloy kun bala nasal-an si Adonis nga ginasundan ang mga kapulisan.
Nagapanindugan ang pamilya nga wala sang armas ang biktima sang natabo sang insidente.
Samtang pahayag naman sang kaupod sang biktima sa motorsiklo sang natabo ang insidente, wala sang checkpoint nga natabo kag ang tatlo ka mga pulis ang ginapahayag nga wala naka uniporme.
Nagdepensa man ang Iloilo 2nd Mobile Force Company sa diin ila ginpahayag nga nagpalagyo sa chekpoint si Hontiveros kag nag-una palupok sang armas-luthang.
Ginlubong na kahapon nga adlaw ang bangkay sang biktima.
