ILOILO CITY – Gintago sa ginasuksok nga palda sang isa ka iloy sa banwa sang Btac. Nuevo ang gatas nga ginkawat sa isa ka grocery store.
Ang suspek amo si Alyas Marjorie, 56, sa amo man nga banwa.
Sa interview sang Bombo Radyo kay Pol. Lt. Francis Lomahan, deputy chief of police sang Btac. Nuevo Municipal Police Station, iya ginpahayag nga nakita sang mga staff sang grocery store si Marjorie nga nagkawat sang powdered milk drink kaupod ang isa pa nga nakapalagyo.
Suno kay Lomahan, gin-ipit ni Marjorie ang duha ka gatas sa iya malaba nga palda.
Naglab-ot sa P3, 458 ang balor sang gatas nga nakuha ni Marjorie sa amo nga grocery store.
Nagapati ang kapulisan nga ibaligya sang mga suspek ang gatas bangud wala man sila sang bata nga gagmay nga amo ang maga-inom sini.
Sa subong, preso na sa Btac. Nuevo Police Station si Marjorie samtang nakapalagyo naman ang isa pa ka suspek.
