Wala sang iloy nga wala nagapalangga sa ila anak.
Tanan ila himuon agud lamang nga mahatag ang kinahanglanon kag mangin malipay ang ila mga kabataan.
Apang didto sa Nikolaev sa Ukrain, ang 51 anyos nga iloy ang gindakop sang mga otoridad matapos matukiban nga nagakutkot ini sang underground tunnel malapit sa bintana sang presohan sa diin nahamtang ang iya nga anak bangud sa kaso nga murder.
Ini agud nga mabuligan sang iloy ang iya anak nga makapalagyo.
Nag-arkila ang babaye nga wala na ginhingadlan malapit sa presohan sa diin yara ang iya anak.
Kada gab-i, hinay-hinay niya nga ginakutkot ang duta tubtob nga nangin 10 ka tapak na ang kadalumon sini sa sulod sang tatlo ka semana.
Malapit na kuntani malab-ot sang iloy ang presohan sang iya anak apang nadakpan ini sang mga otoridad.
Suno kay Serhey Pilnyansky, residente sa lugar, wala gid niya matalupangdan ang iloy nga nagaguwa ini kun gab-i.
Mismo ang mga pulis sa lugar ang nag-ako nga ginkakibot nila ang ginhimo sang iloy nga apisar babaye ini, natinguhaan niya magkutkot sang duta nga tuman na ka dalom.
Apisar sala ang ginhimo sang iloy nga ipalagyo ang iya anak, nag-angkon naman ini sang pagdayaw sa mga residente sa Nikolaev bangud sa pagpalangga nga may yara ang iloy sa iya nga bata.
(Via Oddity Central)
