GUIMARAS – Luyag kuntani nga maghingyo ang iloy sang 18 anyos nga napatay bangud sa pagkulob sang motorbanca sa Iloilo strait kay Presidente Rodrigo Duterte nga mapadasig ang pagpauli sang iya bana nagikan sa Saudi Arabia.
Ang napatay amo si Ma. Rycille Sol Therese Fenis nga isa ka accountancy student sa isa ka unibersidad sa syudad sang Iloilo.
Sa interview sang Bombo Radyo kay Cecilia Fenis, iloy sang biktima, iya ginpahayag nga bugtong nga anak si Rycille gani kinahanglan niya kuntani ang iya bana nga yara sa iya luyo.
Apang bangud sa malain nga panahon kahapon nga adlaw, wala nadayon nga makapadulong si Duterte sa probinsya sang Guimaras.
Suno kay Fenis, siya ang masami nagapukaw sa iya nga anak, naga init sang tubig kag naga-himos sang kinahanglanon antes magtabok padulong sa Iloilo si Rycille agud mag- eskwela.
Antes pa man matabo ang insidente, naga-istoryahanay pa sila sang iya nga anak kag ginpahibalo man siya ni Rycille nga sa MB Chi-chi ini nakasakay.
Sang mahibaluan ni Cecilia nga nagkulob ang ginasakyan nga motorbanca sang iya nga anak, nagdalikat ini nga nagpadulong sa Philippine Coast Guard.
Nadugayan pa sa pagpangita sa iya anak apang sang ulihe, nahibaluan na lang niya nga patay na ini.
