Gin-ako sang iloy sang construction worker nga gintiro-patay sa Gonzaga Street, Brgy. Purok 4, Pavia, Iloilo nga nakabisita pa ang ka-live-in partner sang iya anak sa ila puluy-an sa Guimaras.
Ang biktima sa amo nga insidente amo si Joven Galvez Job, 35-anyos, ka live-in partner ni alyas “Joy” kag residente sang Brgy. Sapal, San Lorenzo Guimaras.
Ang suspek naman amo si Arnold Mamon Viejo, 41-anyos kag residente sa Brgy. Cabugao Norte Pavia, Iloilo.
Sa interview sang Bombo Radyo kay Ursula Job, iloy sang biktima, iya ginpahayag nga isa na ka tuig sang nagtaliwan ang legal nga asawa sang iya anak kon sa diin may duha sila nga kabataan.
Suno kay Job, nagapauli man sa Guimaras ang iya anak tagsa ka semana agud bisitahon ang iya kabataan.
Ginbuyagyag man sang iloy nga may nauna na nga ka-live in ang iya anak apang nagbulagay sila, tubtob nga ginpakilala sini si Alyas “Joy” sa ila.
Una naman nga nagpaandam ang iloy kay alyas “Joy” nga masami lain-lain nga mga babaye ang ginadala sini sa ila puluy-an.
Nahibaluan nga selos ang napanguna nga motibo ang ginalantaw sang otoridad kon ngaa nahimo sang suspek ang krimen.
14 ka tuig naman nga nag-updanay ang suspek kag si Joy kun sa diin mayara ini sang tatlo ka mga kabataan edad, 14, 12, kag 10 ka tuig.
Samtang, tatlo naman ka bulan ini sila naga-updanay sang biktima.
