ILOILO CITY – Pagpangamuyo ang ginsandigan sang isa ka iloy para sa proteksyon sang iya anak nga nagatarbaho bilang isa ka doktor kag padayon nga nagatrabaho agud mag-atipan sang mga pasyente nga nagpositibo sa Coronavirus Disease 2019 (COVID-19).
Sa Good Morning Philippines Program, ginpahayag sang iloy nga si Tess Ruiz Fuentes nga mabudlay para sa iya nga mapahilayo sa iya anak nga nadestino sa Roxas City.
Suno kay Fuentes, indi madula sa iya ang magbatyag sang kahangawa para sa seguridad sang iya doktor nga anak.
Ginpahayag ni Fuentes nga sa pihak sang iya pagpangduha-duha, desidido ang iya anak nga magtrabaho sa rason nga makabulig sa kasubong nga medical fronliners kag sa gobyerno.
Sang adlaw nga nagbiya ang iya anak padulong sa Roxas City, nagangibabaw suno kay Fuentes ang iya pagpangduha-duha sa posible matabo sa iya anak apang ang tanan ang iya na gid lamang nga gin-ampo sa Ginuo.
Magluwas sa risgo nga malatnan sang virus kag sa kakulang sang Personal Protective Equipment suno sa natungdan, nakatuga man sang kahangawa suno sa iloy amo ang diskriminasyon sa medical frontliners.
Bilang iloy, nagahingyo si Fuentes nga untatan na ang diskirmisyon sa medical frontliners kag sa baylo, nagakadapat pa sila nga buligan.
Sa subong suno kay Fuentes, bugal para sa iya nga mangin iloy sang isa ka doktor nga padayon nga nagahatag sang serbisyo agud nga maluwas ang kabuhi sang COVID-19 patients.
