Nagapati ang iloy sang lalaki nga ginpaarakan-luthang sa Barangay Banban, Lambunao, Iloilo, nga ginplanuhan gid ang pagpatay sa iya anak.
Ang biktima amo si Arnel Silva alyas ‘Apa’, ginabanta 40 anyos ang edad.
Sa interview sang Bombo Radyo kay Teresita Gabucay, iloy sang biktima, iya ginpahayag nga posible ang nakaaway sang iya anak sa Calinog, Iloilo ang sa likod sang krimen.
Gin-ako sang iloy nga may hiligut-anon sa tunga sang iya anak kag sa isa ka residente sang nasambit nga banwa bangud sa kwarta.
Nahibaluan nga riding-in-tandem suspects ang nagpaarak- luthang sa biktima sa diin 12 ka igo sa nagkalain-lain nga bahin sang lawas ang naangkon sini.
Samtang, palaligban sa mga Barangay Officials sang Banban, Lambunao, Iloilo kun ngaa ginpatay ang ila pumuluyo.
Sa interview sang Bombo Radyo kay Barangay Kagawad Genelyn Evangeles, iya ginpahayag nga wala man sang malain nga record si Silva sa ila barangay.
Suno kay Evangeles, apisar nagainom-inom kun kaisa ang biktima, wala man ini nagahimo sang gamo kun hubog.
Indi man mapat-od sang opisyal nga nasal-an lamang ang biktima bangud tuman kadamo ang igo sang bala nga naangkon sini.
