ILOILO CITY – Ginpa-Bombo sang isa ka iloy ang paggamit sang pictures sang iya nagtaliwan na nga anak sa isa ka sahi sang scam.
Sa interview sang Bombo Radyo kay Mylene Pacheco sang Barangay Agtambo, Passi City, iya ginpahayag nga isa ka certain ‘Josephine Arzona’ ang naga-post sa Facebook gamit ang pictures sang nagtaliwan na niya nga anak agud nga magpangayo sang donasyon.
Sa post, ginpahayag sang scammer nga nalapwahan sang mainit nga tubig ang iya hinablos gani, nagakinahanglan sila sang bulig. Naghatag pa ini sang numero kun sa diin mahimo nga magpadala sang bulig pinaagi sa isa ka mobile payment application.
Gintinguha-an nga tawgan sang tagreklamo ang nasambit nga numero apang indi na ma-contact.
Suno kay Pacheco, nagalain ang iya buot bangud nga nagapahuway na ang iya anak apang ginagamit pa sang iban nga tawo sa pagpanunto.
Nagpanawagan si Pachecho nga kuntani, untaton na ang paggamit sang iya anak nga nagapahuway na.
Nahibaluan nga sang Pebrero 25 sang aga, nalapnos ang panit sang lapsag matapos nasunog ang ila balay.
Gindala pa ini sa ospital apang nagtaliwan bangud sa kumplikasyon sa baga kag infection sa iya mga pilas.
