Nakilala na ang iloy sang bag-ong bun-ag nga lapsag nga nakit-an sa isa ka abandonado nga kamalig sa Brgy. Velasco, Lemery, sang nagligad nga Sabado, Abril 25.
Sa interview sang Bombo Radyo kay Virgie Cumla, residente sang nasambit nga barangay kag isa sa mga nagresponde sa lapsag, iya ginpahayag nga nakilala ang iloy sang lapsag matapos nga nagpangayo sang bulig ang iya pamilya nga dal-on ini sa ospital bangud nga nagasinakit ang iya tyan.
Suno kay Cumla, ginsaysay sini nga kahadlok sa iya ginikanan ang nangin rason kun ngaa wala niya gindala pauli ang lapsag matapos ini nga ginsakit sang iya amay sang nagbun-ag ini sang iya subang nga bata.
Sa pahayag sang 20-anyos nga iloy, nagalakat-lakat siya sang kaagahun sang gulpi lang niya nabatyagan nga manugbata na ini rason nga nagpadulong ini sa abandonado nga kamalig nga 50 meters ang kalayuon sa ila balay kag ginbun-ag ang lapsag mga alas-7 sa aga.
Ginbilin nya ini sa sulod sang kamalig sa natipon nga mga laya nga dahon kag nagpauli sa ila balay.
Ginbalikan man niya ini mga ala-1 sa hapon, apang wala sa gihapon gindala ang bata bangud sa kahadlok.
Nahibaluan nga alas-5 sa hapon na ini sang nakit-an sang mga residente nga malapit sa lugar kag gintinluan ang bata matapos nga nagdukot na sa panit sini ang mga laya nga dahon.
Sa amo man nga tion, gin-ako sini sa iya iloy nga iya ang lapsag nga nakit-an sa nasambit nga kamalig.
Ginpakigbahin man ni Cumla nga luyag naman sang iloy sang bata nga kuhaon ang iya anak agud nga siya na mismo ang magsapupo, apang magapaidalom pa ini sa assement agud nga mahibaluan kun makasarang na gid man ini sa iya responsibilidad.
Sa subong, yara sa birthing section sa banwa ang nasambit nga lapsag samtang wala pa sang desisyon ang mga otoridad kun ibalik ini sa iya ginikanan.
