Naghatag na ang eight-division legend nga si Manny Pacquiao sang opisyal nga kumpirmasyon sang iya natalana nga pagbalik sa ring.
“I’m back. On July 19, I return to the ring to face WBC Welterweight Champion Mario Barrios at the MGM Grand in Las Vegas. Let’s make history! #TeamPacquiao,” kabahin sang nangin social media post sang 46-anyos nga Pinoy fighter subong nga adlaw.
Nahibaluan nga gina-umpisahan na sini ang iya nga training sa Los Angeles, California agud nga mokondisyon ang lawas ilabi na bangud 2021 pa ang iya katapusan nga professional fight.
Kaupod ni Pacquiao sa Los Angeles ang iya asawa nga si Jinkee kag iya anak nga si Jimuel nga didto na nga daan sa amo nga state.
Natalana nga mag-atubang si Pacquiao kay defending World Boxing Council (WBC) welterweight champion Mario Barrios sa Hulyo 19, 2025 sa Las Vegas, Nevada.
Sang nagligad nga semana nagpaguwa sang latest ranking ang WBC. Gin-lista ang Filipino southpaw sa numero singko sa 147-pound class apisar nga indi na ini aktibo sa boksing halin pa sang Agusto 2021 sang nalutos siya sa hampang sa idalom sang World Boxing Association.
Base sa nauna nga reports, may plano man nga ibutang ang anak ni Pacquiao nga si Jimuel sa professional boxing sa undercard sang Barrios fight.
Antes ang pagbalik sa ring, natalana anay nga magpahuway ang amay nga Pacquaio sa training kag magatambong ini sa enshrinement sa iya sa International Boxing Hall of Fame sa Canastota, New York.
