ILOILO CITY – Makaguba sa imahe kag reputasyon sang Pilipinas sa international community ang pag-atras ni Presidente Rodrigo Duterte sa membership sang Pilipinas sa International Criminal Court (ICC).
Ini ang panan-awan ni Sen. Francis Pangilinan, nga isa sa 17 ka mga senador nga nagratipika sa Senado sang Rome Statute sadtong 2011.
Sa interview sang Bombo Radyo Iloilo, ginpahayag ni Pangilinan nga posible labi mamukmukan ang pungsod kag si Presidente Rodrigo Duterte sa mga akusasyon nga paglapas sa tawhanon nga kinamatarong bangud sa lihok nga ini sang Chief Executive.
Apisar indi pa mahibaluan ang impact sini sa ginapatigayon nga imbestigasyon sang ICC batok sa presidente sang Pilipinas, ginpahayag sang senador nga posible panumdumon sang korte nga wala nagakooperar ang presidente kag mahimo may ginatago.
Dugang pa ni Pangilinan, magaguwa man nga wala sang respeto ang Pilipinas sa human rights kag rule of law.
Indi man importante suno sa senador kun i-review pa sang Senado ukon indi ang pag-atras sang Pilipinas sa treaty bangud pagkatapos pa sang isa ka tuig ini mangin epektibo kag padayon gihapon ang imbestigasyon batok kay Duterte.
Gin-ehemplo ni Sen. Pangilinan ang natabo sa Burundi nga nag-atras sa Rome Statute sang nakaligad nga tuig apang karon gina-imbestigaran ini sang International Criminal Court.