ILOILO – Ginkontra sang pahayag ni Iloilo Police Provincial Office (IPPO) officer-in-charge Police Colonel Gilbert Gorero ang statement sang newly-installed Police Regional Office VI director nga si PBGen. Rolando Miranda nga SOLVED na ang kaso sang pagluthang-patay sa isa ka police asset sa Barangay Abilay Sur, Oton, Iloilo.
Sa interview sang Bombo Radyo kay Gorero, iya ginpahayag nga nagapadayon pa ang imbestigasyon sang Special Investigation Task Group sa “legitimate drug buy bust operation” nga gin-updan sang biktima nga si Police Corporal Felfranz Lumahang sang Nobyembre 28.
Wala sang makalusot sa imbestigasyon bangud busision suno kay Gorero ang manner sang operasyon.
Hibaluon man kun posible may yara sang kakulangan sa operating team sang ginpatigayon ang police operation kun sa diin ginpahayag naluthangan-patay ang biktima sang suspek nga naga-angkas sa motorsiklo.
Imbestigaran man kun ngaa wala nagasanto ang spot report nga SHOOTING INCIDENT ang rason sang kamatayon ni Lumahang sa ACCIDENTAL FIRING nga amo ang record sa Iloilo Doctors Hospital kun sa diin gindala ang bangkay sang nasambit nga pulis.
Lakip man sa usisaon amo ang paghipos sang hepe sang Oton Municipal Police Station kag kun ngaa wala sang update nga ginahatag sang publiko apisar madamo pa nga palamangkutanon ang wala nasabat.
“Kun indi kita kag maghulag kag kun indi magtukod sang SITG (Special Investigation Task Group), it would be unfair to the general public who wanted to know what really transpired there,” pahayag ni Gorero.
Ang task group nga gintukod ang pamunuan sang Deputy Provincial Director for Operations sang Iloilo Police Provincial Office.
