ILOILO CITY – Padayon pa ang imbestigasyon sang otoridad sa natabo nga shooting incident sa Zone 3, Barangay Tacas, Jaro, Iloilo City kun sa diin, anum ang pilason.
Wala pa nakilala ang mga suspek nga nagasakay sa Mio nga motor kag naka-helmet.
Ang apat ka mga biktima nga gindala sa Western Visayas Medical Center (WVMC) amo sanday:
Engr. Mark Ringor, head engineer, residente sang Manila kag may igo sa balikawang;
Engr. Jessen Deaño, 28, sang Barotac Nuevo nga may igo sa abaga;
Antonio Gasis, worker sang Barotac Nuevo nga may igo sa mata;
Edgar Castro sang Barangay Baldoza, La Paz nga wala mahibaluan kun diin ang pilas
Ang duha naman nga pilason nga gindala sa West Visayas State University Medical Center (WVSU-MC) amo sanday:
minor nga si Jonelle, 16, sang Barangay Tacas, Jaro nga may pilas sa abaga; kag
Ace Locsin sang Barangay Tacas, Jaro nga may pilas sa tuhod.
Sa interview sang Bombo Radyo kay Punong Barangay Joseph Poral, iya ginpahayag nga lunsay nagatrabaho ang mga biktima sa isa ka construction company nga naga-opisina sa amo nga balay.
Suno kay Poral, may yara sang ginahiwat nga birthday party sang ila nga head engineer.
Sa impormasyon ni Poral, hinali lamang nga may nag-untat nga motor sa gwa sang amo nga balay kag ginpangtiro ang mga biktima.
Wala pa nahibaluan kun sin-o ang suspek kag ang motibo sang pagpaniro.
