ILOILO CITY – Wala pa sang pinal nga resulta sang imbestigasyon ang Philippine Coast Guard tuhoy sa pagka-sunog kag pag-lupok sang power barge sang AC Energy Corporation sa Zone 3 Bo. Obrero, Lapuz, Iloilo City.
Sa interview sang Bombo Radyo kay Philippine Coast Guard-Iloilo commander Joe Luviz Mercurio, iya ginpahayag nga base sa initial investigation may posibilidad nga nagpatigayon sang acetylene work ang mga crew sang power barge rason sang pagka-sunog sini, paglupok kag pagtagas sang langis sa baybayon.
Apang ang ini nga inisyal nga imbestigayon pahayag niya ang pila lamang sa madamo nga rason nga ginalantaw sang Philippine Coast Guard sa pagka-sunog sang power barge.
Kun sa kalaparon nga nasakop kag nalab-ot sang oil sheen, suno kay Mercurio indi pa niya ini mapat-od apang yara naman sa 130,000 liters na nga bunker fuel ang na kolekta sang Philippine Coast Guard gamit ang skimmer device.
