Imbestigasyon sa pagpatay sa tinawo sang Vice Mayor sa Valderrama Antique, nagapadayon

VALDERRAMA, ANTIQUE – Nagapadayon subong ang imbestigasyon sang Philippine National Police (PNP) ang natabo nga pagpangluthang sa Valderrama Antique sa diin patay ang supporter ni Vice Mayor Josefino Castillon.

Ang biktima amo si Angelito Roquero Jr., 26 sang Brgy. Takas sa nasambit nga banwa sa diin nag angkon ini sang pilas sa dughan nga amo ang rason sang iya kamatayon.

Sa exclusive interview sang Bombo Radyo kay Police Major Joseph Puno, hepe sang Valderrama Municipal Police Station, iya ginpahayag nga nagtambong sang bayle sa Brgy. Buluangan I, si Vice Mayor Castillion kaupod ang biktima.

Sang nagwa na ang mga ini sa venue, diri na kag nagpangluthang ang suspek nga si Raymart Francisco, 25, sang Brgy Cansilayan.

Suno sa hepe, nakit-an mismo sang bise alkalde ang suspek sa pagpangluthang.

Indi naman makumpirma kun ang bise alkalde ukon ang tinawo sini ang target sang suspek.

Sa subong, preso na ang suspek kag natalana naman nga ipaidalom sa autopsy ang bangkay sang biktima.

Nahibaluan nga si Castillon ang liwat nga nagapadalagan bilang bise alkalde sa Valderrama Antique.