ILOILO CITY – Nagpangayo sang plaso ang Iloilo City Police Office antes makahatag sang kumpleto nga detalye may kaangtanan sa pagluthang-patay sa 17 anyos nga solterito sa Brgy. Salvacion Habog-Habog, Molo, Iloilo City.
Ini ang ginpahayag ni Iloilo City Councilor Jojo Javellana, chairman sang Committee on Police Matters sa Iloilo City Council, kasunod sang iya pagpakigsapol sa mga personnel sang Iloilo City Police Office.
Sa interview sang Bombo Radyo kay Javellana, iya ginpahayag nga yara na sa critical stage ang imbestigasyon sang otoridad apang sa subong, indi pa nila mahimo nga iplayag ang kabug-usan nga detalye.
Suno kay Javellana, mapilitan siya nga magpasar sang resolusyon sa ila sesyon sa masunod nga semana kun wala pa sang major development sa imbestigasyon sang Iloilo City Police Office.
Naalarma si Javellana sa nagakatabo nga riding-in-tandem incidents ilabi na nga ang natabo sa 17 anyos nga solterito ang mistaken identity lamang kag wala pa makilala ang duha ka mga suspek.
Ginpahayag ni Javellana nga antes pa man ang pagluthang-patay sa solterito, madamo na nga riding-in-tandem incidents ang natabo nga tubtub subong, wala pa sa gihapon nahatagan sang kasanagan.
