Natapos na sang National Bureau of Investigation (NBI) ang imbestigasyon sa ginbuy-an nga pamahog ni Vice President Sara Duterte batok kay President Ferdinand ”Bongbong” Marcos Jr., First Lady Louise ”Liza” Araneta-Marcos, kag Speaker Ferdinand Martin Romualdez.
Suno kay Prosecutor General Richard Fadullon, kinahanglan pa nga i-evaluate ang inisyal nga resulta sang imbestigasyon. May ipadala nga prosecutors para malantaw ang mga ebidensya nga yara sa kustodiya sang NBI.
Magadepende pa diri kun bala may rekomendasyon nga himuon nga i-file na sa department ukon ibalik pa sa NBI para madugangan ang ebidensya.
“Depending on the outcome, we will be able to make a recommendation whether to have it considered filed already before the department and/or to return it to the NBI if there’s a need to build up the case further and add to the evidence that they have,” pahayag sini.
Ginpasigurado sini nga maid-id ang trabaho sang NBI kag Department of Justice (DOJ) kaangot sini nga bagay.
Ginpahayag naman ni Justice Undersecretary Raul Vasquez nga ang pag-evaluate sa nangin imbestigasyon sang NBI ang kabahin sang ginatawag nga ”case build up.” Suno sa opisyal, kun makit-an sa evaluation nga bastante na ini agud makapadayon sa preliminary investigation, dira kag maga-umpisa ang preliminary investigation proper.
Matandaan nga ginpatawag sang NBI si Duterte agud nga ipaathag ang iya pahayag nga nag-hire ini sang tawo nga ipapatay sanday Marcos, Liza, kag Romualdez kun may magpatay man sa iya.
Una na ginsiling ni Sara nga wala na siya naga-asa nga mangin patas pa ang dalagan sang imbestigasyon.
Ang gina-imbestigaran sa bise presidente amo ang alleged grave threats nga kaangot sa Cybercrime Prevention Act of 2012 kag possible violation sang Anti-Terrorism Act of 2020 kasunod sang ginaalegar nga kill order.#
