MANILA – Ginaduso ni Senate Minority Leader Franklin Drilon nga imbestigaran ang ginapahayag “overpricing” nga ginahimo sang Philippine Health Insurance Corporation (PhilHealth) sa coronavirus disease 2019 (COVID-19) test package rates sa Pilipinas.
Sa exclusive interview sang Bombo Radyo kay Drilon, iya ginpahayag nga kun matuod ang “overpricing”, posible maglab-ot sa P8 billion ang madula nga pondo gikan sa pamunuan.
Una na nga ginpahayag ni Drilon nga base sa ginhatag nga impormasyon ni Health Secretary Francisco Duque III sa Senate committee, may yara sang P8,150 nga ginatigana ang PhilHealth para sa tagsa ka persona nga ginapaidalom sa COVID-19 test sa public ukon private laboratory.
Pahayag ni Drilon, tuman ini kataas nga kantidad ipaanggid sa P3,500 nga ginabayaran sang PhilHealth para sa amo man nga COVID-19 test sa idalom sang kontrata sa Philippine Red Cross.
“Ang pamangkot ko, kun pwede maobra sang Red Cross ang testing for P3,500 kun diin nag-sige man ang PhilHealth, ngaa ang ila (PhilHealth) financial package P8,150? Sobra! Ang overpricing will incur an overprice of over P8 billion kay te duha ka milyon ang target nila nga testingan.”
Ang P8,150 para sa COVID-19 testing ang nagalakip sang screening nga nagabalor sang P509.06; diagnostic workup nga P799.69; specimen collection nga P947.12; specimen transport nga P451.14; kag polymerase chain reaction (PCR) testing nga P5,422.91.
Suno kay Drilon, sang ginbuyagyag niya sa Senado ang amo nga “overpricing”, gilayon man nga ginpanubuan sang PhilHealth ang COVID-19 test package rates sa balor nga P4,150.
Apang, indi gihapon kumbinsido si Drilon sa kapin tunga nga ginbuhin sang PhilHealth sa test package rates bangud mas mataas gihapon ini sa rate sang Philippine Red Cross.
“Sila gani indi man kumbinsido. Ngaa ‘bi ginpanubuan nila dayon?”
May kaangtanan naman sa madamo pa nga ‘korapsyon’ nga nagakatabo subong nga may yara sang COVID-19 pandemic, pahayag ni Drilon: “Amo gid na ang isa pa gid. Maabot gid na ang adlaw nga madakpan ta sila.”
Sang damlag lang, ginpahayag ni Senator Panfilo Lacson sa online hearing sang Senate committee nga nagbakal ang Department of Health (DOH) sang medical equipment nga duha ka pilo ang balor ipaanggid sang ginbakal sang mga pribado nga sektor.
Ini ang magluwas pa sa ginbuyagyag man ni Iloilo First District Representative kag anay DOH Secretary Dr. Janette Garin nga may yara sang mag-asawa (may inisyal nga “V” kag “E”) nga “kurap” nga amo ang rason sa pag-delay sang importasyon sang COVID-19 testing machines sa pungsod.
“Ay dugay na na, kapila na na,” dugang pa sang senador.
Sa subong, nagapakig-angot si Drilon sa Malacañang kag sa Office of the Ombudsman agud maimbestigaran ang gina-alegar “korapsyon”.
Sa pamangkot kun bala maga-imbestigar man ang Senado, sabat ni Drilon samtang ginatumod ang restrictions sang National Inter-Agency Task Force sa mga pagsinapol sa senado: “Wala pa kami subong sang tiempo, but yes, we will file a resolution once magbalik na kami sa Hulyo.”
