Magahimo sang maragtas ang Filipinas subong nga adlaw, Hulyo 21, bangud ini ang labing-una nga pagtapak sang Philippine football team sa pitch sa FIFA World Cup.
Atubangon sang Filipinas ang Switzerland ‘la una karon sa hapon (oras sa Pilipinas) sa opening match sa Dunedin Stadium sa New Zealand.
Pinakanubo ang rank sang Pilipinas sa Group A bangud pang-46 lamang ini sa world rankings, samtang nagapanguna sa grupo ang Norway nga pang-12 sa kalibutan; Switzerland nga pang-20; kag New Zealand nga pang-26.
Tanan nga pungsod ang maka-partsipar sa tatlo ka hampang sa group phase. Ang duha naman sa pinakamataas nga mga team sa kada grupo amo ang maga-abanse sa Round-of-16 knockout stage.
Nagapanguna sa Filipinas ang Australian coach nga si Alen Stajcic; samtang team captain naman si Tahnai Annis kag co-captain si Hali Long sa amo nga football tournament.
Apisar sang prediksyon sang mga eksperto nga indi makalusot ang underdog nga Pilipinas sa group stage, nagpahayag naman ang team nga handa sila sa global stage kag determinado nga pamatud-an nga kuwalipikado sila sa amo nga lebel.
Matapos atubangon sang Pilipinas ang Switzerland subong nga adlaw, makasumpong sini ang host nga New Zealand sa Hulyo 25 sa Wellington, kag magabyahe balik sa Auckland para sa match batok sa Norway sa Hulyo 30 agud makumpleto ang group stage. #
