ILOILO CITY – Kadungan sang imbukada sang 2023 Western Visayas Regional Athletic Association Meet sa Makato, Aklan, may yara sang narekord nga tatlo ka mga atleta nga nalipong bangud sa pagpatial sa initan.
Ang mga atleta ang lunsay nagikan sa probinsya sang Antique kun sa diin gintatap ang mga ini gilayon sang medic.
Apisar sini, nangin madinalag-on sa gihapon ang meet kasunod sang pagpasalig sang probinsya sang Aklan nga nakapreparar ini sa ano man nga sahi sang emerhensya.
Sa interview sang Bombo Radyo kay Iloilo Governor Arthur DefensorJr., iya ginpahayag nga ginpanginbulahan sini ang pagpamuno ni Aklan Governor Jose Enrique “Joen” Miraflores bangud nangin smooth sailing ang pagpahamtang sang meet.
Suno kay Defensor, nagahandom ini nga kilalahon ang Western Visayas bilang isa ka ‘competitive’ nga rehiyon pinaagi sa pagpasanyog sang ‘competitive spirit’ sang mga pamatan-on.
Ginpahayag dugang sang natungdan nga tuman ka importante ang paghanas sang mga pamatan-on agud mangin tiglawas sang rehiyon sa next level sang hinampang.
