Subong nga adlaw, Disyembre 8, nakaandan sang mga Katoliko nga iselebrar ang Solemnity of the Immaculate Conception of the Blessed Virgin Mary.
Apang subong nga 2024, may pagbag-o nga gin-anunsyo ang Simbahan kaangay sang pagsaylo sang liturgical celebration sini nga kapiyestahan buwas, Disyembre 9.
Ini bangud nagatupa ini sa Domingo nga dungan man sa selebrasyon sang ikaduha nga Sunday of Advent.
Ang Advent amo ang pag-umpisa sang liturgical year sang Simbahan ukon ang tion sang preparasyon samtang nagahilapit ang Christmas nga amo naman ang selebrasyon sang pagkatawo ni Hesus.
Sa circular nga ginpaguwa sang Nobyembre 14, ginpaathag sang Archdiocese of Manila nga sa idalom sang Liturgical Calendar, ang Sunday of Advent ang ginakonsiderar sang Simbahan nga mas importante ipaanggid sa solemnity pananglitan nga magtupa ang duha ka selebrasyon sa pareho nga adlaw — nga amo ang kaso subong nga tuig.
“Solemnities that fall on a Sunday of Advent or Lent are ‘transferred to the following Monday unless they occur on Palm Sunday or on Sunday of the Lord’s Ressurection,” kabahin sang circular.
Ang Solemnity of the Immaculate Conception isa man ka holy day of obligation para sa mga Katoliko, buot silingon, required ang pagtambong sa Holy Mass.
Apang bilang paghatag pabor sa Filipino daily wage earners, gin-aprubahan naman sang Vatican ang petition sang Catholic Bishops’ Conference of the Philippines (CBCP) nga indi na obligado ang mga tumuluo nga magtambong sa Holy Mass buwas, Disyembre 9.
“The Philippine bishops made this request considering that it would be difficult or even impossible for many Filipino Catholics to go to Mass on a working day since they are daily wage earners and rely on this for their family’s sustenance,” suno kay Ilagan Bishop David William Antonio, chairman sang Episcopal Commission on Liturgy.
“The Dicastery responded positively to the request, stating that ‘the obligation to attend Mass does not apply this year.’ Thus, even if the celebration of the Solemnity is transferred to December 9, 2024, the faithful is no longer obliged to participate in the Mass on that day.”
Nahibaluan nga sa idalom sang Republic Act 10966, ginakonsiderar ang December 8 bilang special non-working holiday sa bilog nga pungsod bilang pag-komemorar sa Solemnity of the Immaculate Conception nga amo ang principal patroness sang Pilipinas.
