Gin-aresto na sang anti-corruption agency si South Korean President Yoon Suk Yeol.
Ini matapos ang pila ka semana nga tensyon matapos ang makakilibot sini nga pagdeklarar sang martial law sang nagligad nga bulan.
Suno sa otoridad, gin-aresto si Yoon para sabton ang madamo nga mga pamangkot.
Nagbiya si Yoon sa iya residential compound kaupod ang mga imbestigador sa isa ka motorcade agud ikustodiya.
Ini ang una nga bes nga ginhimo ang kaangay nga tikang batok sa isa ka sitting president sa South Korea.
Si Yoon ang wanted para sa questioning sa multiple investigations nga naangot sa iya martial law declaration, kalakip na ang akusasyon nga utok ini sang insureksyon nga isa ka krimen nga mahimo silutan sang life imprisonment kag mangin sang death penalty.
Matandaan nga sa sulod sang pila ka semana, yara lang ang president sa iy balay nga ginapalibutan sang Presidential Security Service team, agud punggan ang pag-aresto sa iya samtang nagapangatubang sang pila ka probes kag impeachment trial.
Kasunod sang pag-aresto sa iya, nagpagwa si Yoon sang pre-recorded video message kun sa diin liwat sini nga gin-dismiss ang imbestigasyon sa iya kag gintawag sini nga “illegal” kag ginsiling nga indi na masaligan ang layi sa amo nga pungsod.
Ang warrant ang nagapahanugot sa mga imbestigador nga ikustodiya si Yoon sang tubtob sa 48 oras.
Kinahanglan sang Corruption Investigation Office nga mag-apply para sa arrest warrant sa sulod sang amo nga period agud ma- detain ini sang mas malawig.
