ILOILO CITY – Ginpasiguro sang liderato sang Kamara nga ipaagi sa proseso ang impeachment case nga ginpasaka ni Magdalo Rep. Gary Alejano batok kay Presidente Rodrigo Duterte.
Sa exclusive interview sang Bombo Radyo Iloilo, ginpahayag ni House Speaker Pantaleon Alvarez nga apisar malabo nga mag-prosper ang impeachment , igapaagi gihapon ini sa proseso.
Kabahin diri suno sa kongresista ang pagdeterminar kun sufficient in form and substance ang reklamo nga ginpasaka ni Alejano.
Ginhangkat sang House Speaker si Alejano nga siguraduhon lang nga may nagakaigo nga ebidensiya ang mga reklamo sini batok kay Presidente Duterte agud makatindog ang reklamo.
Samtang, sa isyu sang plano nga pagpasaka sang impeachment case batok kay Vice President Leni Robredo, ginpahayag ni Alvarez nga padayon pa niya ini ginatun-an.
Apang ginkondenar sang lider sang Kamara ang ginapahayag sini nga wala pugong-pugong nga pagguba sang bise presidente sa pungsod sini, kadungan sang video message sa United Nations Convention on Narcotics Drugs.
Una ini sa maragtas sang Pilipinas suno kay Alvarez, nga ang isa ka mataas nga lider mismo ang nagguba sang iya pungsod.
Gintawag ni Alvarez nga iresponsable ang ginhimo ni Robredo kag indi na luyag tawgon nga vice president si Leni bangud nga indi suno sa House Speaker mapatihan ang pagdaog sang bise presidente sa eleksyon.