Ginpahayag sang mga incoming lawmakers sa 20th Congress nga sanday Chel Diokno kag Panfilo Lacson nga indi mahimo ibasura sang senator-judges ang impeachment complaint batok kay Vice President Sara Duterte base lang sa simple majority vote.
Ini kasunod sang pagpahayag ni Senate President Francis Escudero nga mahimo botohan sang Senate impeachment court ang mosyon sa pagbasura sang kaso ni VP Sara.
Suno kay Diokno nga wala nakasaad sa Konstitusyon ang ‘simple majority vote’ agud ma-dismiss ang impeachment.
Samtang, ginpaboran naman ni Lacson ang opinyon ni Diokno kag ginpunto nga ang mosyon sa pag-dismiss sang impeachment case sang Bise Presidente ang dapat maghalin sa iya nga defense team kag indi gikan sa mga senador nga nagapungko bilang hukom sa impeachment proceedings.
Gintawag pa sini nga indi husto kag makahalam-ot ang ideya nga pag-move ukon pagsumiter sang isa ka senator judge sang mosyon sa pagbasura sang kaso.
