Magadiretso na sa hearing proper ang House Justice Committee matapos makitaan sang bastante nga basehan ang duha ka magkatuhay nga impeachment complaints batok kay VP Sara Duterte.
Sa pagtakop sang hearing sang komite sa duha ka reklamo kahapon,March 18, 2026, ginplastar na na ni committee chair, Rep. Gerville Luistro ang mga petsa para sa mangin hearing.
Ini ginalakipan sang mga masunod nga petsa:
March 25, 2026
April 14, 2026
April 22, 2026
April 29, 2026
Kahapon sang gindeklarar sang House Committee on Justice nga “sufficient in grounds” ukon may bastante nga basehan ang duha ka impeachment complaints batok kay Vice President Sara Duterte.
Suno sa House panel, indi direkta nga ginsabat ni VP Sara ang mga alegasyon batok sa iya sa iya nga ”Answer Ad Cautelam,” nga gin-file bilang sabat sa mga reklamo.
Ang duha ka impeachment complaints ang nagaunod sang mga akusasyon sa Bise Presidente kaangay sang betrayal of public trust, culpable violation of the Constitution, kag iban pa.
Kaangot ini sa ginaalegar sala nga paggamit sang P612.5 million confidential funds kag pagpamahog sa kabuhi ni Presidente Ferdinand Marcos Jr. kag iya nga pamilya.
Suno kay House Deputy Minority Leader Leila de Lima, nga ang nangin sabat sang Bise Presidente ang wala nagasabat sa mga alegasyon.
Dugang pa ni de Lima nga wala man sang paathag si Duterte tuhoy sa malversation sang pondo, anomalous disbursements, ukon sa mga envelopes nga ginpanghatag sa pila ka opisyal sang Department of Education.
Bangud diri, mahimo na nga mapadayon sang komite ang impeachment hearing proper, kun sa diin talakayon kag busision ang mga ebidensya kag testimonya sang pareho nga complainants kag ni VP Sara.
Bag-o ang botohay, una na nga gin-athag ni House justice panel chair kag Batangas Second District Rep. Gerville Luistro, nga mabug-at ang mga alegasyon kag nagakinahanglan sang konkreto nga sabat.
