Isa na ka imposible nga handum ang impeachment batok kay Vice President Sara Duterte.
Ini suno kay Senate President Vicente “Tito” Sotto III kasunod sang desisyon sang Korte Suprema nga palig-unon pa ukon i-uphold ang nauna nga desisyon sini nga nagadeklarar nga unconstitutional ang impeachment sang Kamara batok sa bise-presidente.
Sa statement ni Sotto, ginpahayag sini nga masubo ini nga adlaw para sa mga estudyante kag propesor sang Constitutional Law bangud sa ginhimo sang Supreme Court nga pag-amyendar “unconstitutionally” sa Konstitusyon.
Dinekada pa ang hulaton suno sa iya antes matadlong ini nga misinterpretation.
“The Constitution had just been amended unconstitutionally through the Supreme Court’s overreach. It will take decades of retirements to correct this misinterpretation. When the law is clear, there is nothing to interpret, as any first-year law student knows,” kabahin sang statement ni Sotto.
Pahayag pa sini, ang ruling sang Korte Suprema ang maathag nga pagsulod ukon pagpahilabot sa gahum sang legislative branch. Sa amo nga desisyon suno sa iya, naghimo ang Supreme Court sang bag-o nga pagsulundan nga sundon sang Kongreso kun may impeachment.
“The decision is a clear judicial legislation. The SC, as written in their decision, admitted of introducing a rule for Congress to follow in the conduct of impeachment. A clear encroachment on the power of the Legislative branch, as provided for by the Constitution,” suno sa Senate President.
“Impeachment is now an impossible dream,” dugang sini.
Kahapon, Enero 29, sang gin-anunsyo ni Supreme Court spokesperson Atty. Camille Ting nga nag-desisyon ang en banc sang may pinalidad nga ginabasura sini ang motion for reconsideration nga ginpasaka sang Kamara.
Ang amo nga mosyon sang Kamara ang nagatuyo kuntani nga baliskaron ang nauna nga desisyon sang Korte Suprema nga nagdeklarar sang articles of impeachment batok kay Duterte bilang unconstitutional.
Matandaan nga ginpasaka sa Senado ang ikaapat nga impeachment complaint batok kay Duterte sadtong Pebrero 5, 2025.
Sa paglantaw sang Supreme Court, covered na ini sang one-year bar rule sandig sa Article XI, Section 3, Subsection 5 sang Constitution.
Suno naman kay Senator Imee Marcos nga kaalyado ni Duterte, ang desisyon sang Korte Suprema ang nagapakita sang kadalag-an sang rule of law kag pamatuod nga wala sang tawo nga labaw pa sa Konstitusyon. Apisar sini, sigurado man ang senadora nga may impeachment complaint na naman nga i-file batok sa vice president sa Pebrero 6.
“This is a victory for the rule of law and a reminder that no matter how powerful are the people behind the impeachment of VP Sara, no one is above the Constitution,” suno sa presidential sister.
“But whilst there will be no more shortcuts, we are full[y] certain that another impeachment complaint will be filed after February 6,” dugang sini.
Matandaan nga sang Disyembre 2024, tatlo ka impeachment complaints ang ginpasaka batok kay Duterte nga lunsay naangot sa iya kontrobersyal nga confidential funds. Ang ikaapat nga complaint amo ang gin-endorso sang Kamara kag ginpasaka sa Senado.
Sang Agusto 2025, nagboto naman ang kadam-an sang mga senador nga i-archive ang articles of impeachment kasunod sang nauna nga desisyon sang Supreme Court nga unconstitutional ini.#
