Gin-suspend sang Senate Impeachment Court ang impeachment trial ni Vice President Sara Duterte nga naka-schedule kuntani buwas, Agosto 19, bangud sa padayon kag mabaskog nga pag-ulan nga dala sang Habagat.
Base ini sa notice nga ginpaguwa ni Senate Secretary kag Impeachment Clerk of Court Renato Bantug Jr.
Ginhimo ang desisyon kasunod sang mandu sang Malacañang nga magpatuman sang alternative work arrangements sa mga government office sa Metro Manila kag iban pa nga lugar nga apektado sang habagat.
Base sa PAGASA, nagbaskog bilang Tropical Depression Neneng ang isa ka low pressure area nga yara sa sulod sang Philippine Area of Responsibility (PAR). Magluwas diri, may duha pa ka bagyo nga yara sa gwa sang PAR.
Ini na ang ikaduha nga sunod-sunod nga adlaw subong nga semana nga kanselado ang trial bangud sang pagbaha kag pag-ulan.
Sang Lunes, matandaan nga ginpresentar sang prosecution ang ila una nga hostile witness nga si Gina Acosta nga nag-testify nga si Duterte mismo ang nagmandu nga i-release ang iya nga P125 million nga confidential funds sa iya nga assigned “security officer” sa last quarter sang 2022.
Si Acosta amo ang former special disbursing officer sang Office of the Vice President (OVP).#
