Nagapati ang fomer Dean sang College of Law sang University of San Agustin nga mahimo nga magserbe nga inspirasyon ang nagapadayon nga impeachment trial batok kay Vice President Sara Duterte agud mas madamo nga Pilipino ang mapukaw ang interes sa pagtuon sang layi kag sa propesyon sang pagka-abogado.
Sa interview sang Bombo Radyo kay Atty. Jose Mari Benjamin Francisco U. Tirol, iya ginpahayag nga nagalaum siya nga ang katuyuan nga mangin abogado ang magahalin sa matuod nga pagpalangga sa layi kag indi lamang bangud sa maangkon nga popularidad ukon temporaryo nga interes nga dulot sang mga isyu subong.
Suno kay Tirol, ang pagka- abogado ang indi lamang tuhoy sa pagtuon sang mga teknikalidad kag mga proseso sa korte, kundi labaw sa tanan, ang madalom nga paghangop sa dako nga papel sang kasuguan sa sosyodad.
Dugang pa niya, nagalaum siya nga ang impeachment trial ang magaserbe nga kahigayunan agud mas mahangpan sang publiko ang importansiya sang layi sa pagpabilin sang katarungan, maayo nga pagdumala kag pag-uswag sang pungsod.
Ginlaragway naman ni Tirol nga mas mahalog ang pag-uyat sang Senado sa impeachment trial ni Vice President Sara Duterte kumparar sa isa ka regular nga trial sa korte.
Suno sa iya, ginapakita sini nga indi strikto nga ginapatuman sang Senado ang mga teknikal nga pagsulundan sa ebidensya agud indi ma-delay ang trial.
Ginpaathag man niya nga may kinalain ang impeachment court sa isa ka ordinaryong hukmanan bangud indi tanan nga senator-judges ang abogado.
Suno sa iya, bangud sini, mahimo nga indi mangin nagapanguna nga basehan ang mga teknikal nga pagpamalabag sa pagdesisyon sang impeachment court.
Ginsiling man ni Moreno nga ang pagpahanugot sang Senado sa magtimbang nga bahin nga magplastar sang ila nga opening statements ang pamatuod sang mas flexible sini nga pag-uyat sa impeachment proceedings.
Dugang niya, ang impeachment indi lamang isa ka legal nga proseso kundi isa ka isyu nga may dako nga interes sa publiko, gani importante nga mapaathag sang prosekusyon kag depensa ang ila tagsa ka bahin sa umpisa pa lang sang proseso.
