Gin-athag sang Department of Agriculture (DA) nga “espekulasyon, estimate, ukon bati-bati” pa lang ang impormasyon nga tag-P400 tubtub P600 ang presyo sang bakuna batok sa African Swine Fever (ASF).
Suno kay Agriculture Assistant Secretary kag deputy spokesman Rex Estoperez, wala pa sang ginhambal ang supplier kun pila matuod ang mangin bili sang bakuna.
Ginatun-an man subong sang DA suno kay Estoperez kun ipanghatag nga libre ang bakuna ukon pabayaran sa mga nagasagod sang baboy.
Tanan ini ang maga-depende suno sa iya kun may mahatag na nga presyo.
Matandaan nga nag-apelar na una ang National Federation of Hog Farmers Inc. sa gobyerno nga i-subsidize ukon sabton bisan ang katunga na lang sang presyo sang bakuna agud nga indi matam-an ang palas-anon sang magagmay ukon medium scale nga local hog farmers.
Matandaan nga sang weekend, ginkumpirma sang Food and Drug Administration nga nakabaton ini sang application nga i-certify ang AVAC vaccine halin sa Vietnam kag i-subject sa pre-assessment.
Gin-cite ang request halin sa Bureau of Animal Industry (BAI) nga magpaguwa na sang Certificate of Product Registration (CPR) para sa immediate distribution sang amo nga bakuna sa pungsod.
