Nagpaandam ang common-law wife ni former President Rodrigo Duterte nga mapa-“impiyerno” gid ang ang mga tawo nga yara sa likod sang pag-aresto sa anay presidente kag pagdala sa iya sa Netherlands.
Suno kay Honeylet Avanceña, sang ginpamangkot niya si Duterte kun akig bala ini nga naka-detain ini sa The Hague, nagsabat ini nga “indi.” Pahayag pa sini, “wrong move” gid ang pag-aresto sa anay punong ehekutibo bangud nagaulikid lamang ini sa iya pungsod.
“I asked him nga eh, ‘how do you feel? Are you angry?’ He said ‘no.’ Kaya yung mga gumawa sa kaniya nito, impyerno kayo,” pahayag sini sa atubang sang vloggers kag reporters sa The Hague. “All he cared for was about his country, alam n’yo ‘yan,” dugang pa sini.
Suno pa sa iya, indi man tarantado, kawatan, ukon bangag si Duterte.
“Buti sana kung naging tarantado, magnanakaw, bangag. ‘Di ba? Akala nila that will put him down. Nagkamali sila. Wrong move,” dugang pa ni Honeylet.
Matandaan nga si Honeylet kag anak sini nga si Veronica “Kitty” Duterte ang nag-abot sa Netherlands sang Marso 26, 2025 antes ang ika-80 nga kaadlawan sang former president.
Marso 11 sang gindakop si Duterte sang nag-abot ini sa Pilipinas halin sa Hong Kong kasunod sang request sang International Criminal Court (ICC) bilang kabahin sang imbestigasyon sa iya kontrobersyal kag maduguon nga “war on drugs”.
Gin-set sang korte ang confirmation of charges sa Septyembre 23 nga amo ang maga-determina kun magapadayon sa trial sa kaso nga crimes against humanity. Natukod naman ang legal team sang presidente kun sa diin lakip sa nahingadlan amo ang veteran defense lawyer nga si Nicholas Kaufman nga amo ang lead counsel kag ang French lawyer nga si Dov Jacobs.
