ILOILO – Plano sang isa ka Ilonggo curator kag culture advocate nga buksan sa publiko ang iya kaugalingon nga museum nga nahamtang sa iya balay sa San Enrique, Iloilo.
Sa interview sang Bombo Radyo kay Dr. Jose Jimenez Patubo, curator, professor, kag Tourism Officer sang San Enrique, Iloilo iya ginpahayag nga luyag niya ipakita sa mga estudyante sang elementary kag high school sa banwa sang Enrique ang iya mga koleksyon.
Suno kay Dr. Patubo, may mga natipon siya nga 117 anyos na nga piano, mga Roman kag Latin musical pieces nga ginsulat pa sang 1856, mga tuman ka dumaan nga bistidura sang pari, mga dalagku nga kawa nga ginlutuan anay sang muscovado nga kalamay sa ila banwa, kag madamo sang iban pa.
Iya ginpahayag nga paagi sini, mabuligan niya ang Department of Education sa pagpalapnag sang ila bag-o nga adbokasiya nga pagpakilala sang mga leksyon nga nakabase sa lokal nga kultura.
Dugang pa ni Dr. Patubo, luyag niya nga mapaintindi sa mga estudyante ang pagpatubo sang pagpalangga sa kultura bangud ini lamang ang paagi nga may ara sang pwede mabatian ang mga kabataan sa masunod nga henerasyon.
