ILOILO CITY- Nagbalik na ang in-person classes sa masobra 100 ka mga eskwelahan sa Hong Kong matapos ang tatlo ka bulan nga suspension bangud sa fifth wave sang COVID-19 infections.
Ini ginabug-usan sang 65 ka international schools kag 52 ka local primary schools.
Suno kay Bombo International Correspondent Jing Banderado Gabiazon, sa bahin sang secondary schools, sa Mayo 3 pa magasugod ang ila in-person classes.
Ang international kag private schools ang ginhatagan naman sang flexibility nga magbukas ano man nga adlaw umpisa Abril 19.
Ginpahayag ni Gabiazon nga ang mga estudyante kag staff ang kinahanglan nga magpaidalom sa daily Covid-19 testing.
Pahayag ni Gabiazon, kun may yara sang isolated positive cases, indi na pag-suspend ang klase apang kun ang numero ang maglab-ot sa threshold nga ginplastar sang gobyerno, mahimo nga ipatuman ang suspension sang klase.
Nahibaluan nga amat-amat na nga nagarekober ang Hong Kong sa pinakamalala nga outbreak sang Covid-19 sang nagligad nga bulan.
Una na nga gin-lift ang ban sa mga flights gikan sa siyam ka mga pungsod kag ginpa-relax naman ang madamo nga social distancing measures lakip na ang pagpahanugot sang dine-in umpisa sa Abril 21.
