ILOILO CITY–Lunsay mga kaalyado lamang ni Iloilo City Mayor Jose Espinosa III ang nagtambong sa inagurasyon sang bag-o nga grandstand sa Muelle Loney, St., City Proper.
Sa interview sang Bombo Radyo kay City Councilor Jay Treñas, iya ginpahayag nga wala siya nakabaton sang sulat ukon text message gikan sa talatapan ni Mayor Espinosa.
Sa pihak sini, ginakalipay ni Treñas nga iya gid nga ginakalipay nga may bag-o na nga grandstand nga mahimo mangin venue sang mga aktibidad sang syudad.
Wala naman sang problema para kay Councilor Joshua Alim nga wala siya gin-imbitar sa inagurasyon sang bag-o nga grandstand.
Suno kay Alim, handa siya nga magtambong sa aktibidad kun may yara siya sang nabaton nga imbitasyon gikan sa kampo sang alkalde.
Ginpahayag naman ni Councilor Lyndon Acap nga nakabaton siya sang imbitasyon gikan sa staff ni Mayor Espinosa.
Indi lang mapat-ud sang konsehal kun bala may yara sang sulat nga ginpadala sa iya talatapan apang nagtambong siya sa inagurasyon bangud sa iya nabaton nga text message.