ILOILO – Limitado lamang sa mga Locally Stranded Individuals kag repatriated Overseas Filipino Workers sa Metro Manila ang inbound flight sa Iloilo International Airport.
Ini matapos nga ginpirmahan na ni Iloilo Gov. Arthur Defensor Jr. ang Executive Order 128-C nga nagapahanugot sang inbound flight sa nasambit nga paluparan.
Sa interview sang Bombo Radyo kay Defensor, iya ginpahayag nga 1,500 passengers lang ang pahanugutan sa tagsa ka semana kag nakadepende na sa Civil Aviation Authority kag sa mga airline companies kun paano tungaon ang nasambit nga numero.
Suno kay Defensor, limitado lamang sa Metro Manila ang inbound flight bangud nga padayon pa ang monitoring sa mga lugar nga high risk kasubong sang Cebu.
Ginpahayag ni Defensor nga wala nakasaad sa guidelines tuhoy sa repatriation nga sundon ang 50% capacity bangud nga kinahanglan lagson ang target nga 1,500 passengers apang may yara lang sang igapatuman nga minimum health standards.
Mahimo nga sa masunod nga mga inadlaw, maga-umpisa na ang inbound flight sa Iloilo International airport.
Sa pihak nga bahin, apisar nga “allowed in principle” kag subject for guidelines sang National Task Force ang tuhoy sa angkas sa motorsiklo, ginpahayag sang Gobernador nga wala pa sang development may kaangtanan sa disenyo nga iya ginpasa sa Land Transportation Office.
Ang tatlo naman ka security guards sa Iloilo Provincial Capitol nga nakasumalang sa isa ka COVID-19 patient ang nagapaidalom na sa quarantine apisar nga may yara sang gamay nga exposure sa virus.
Sa pagpaathag ni Defensor, kinahanglan nga sundon ang protocol agud nga makasiguro nga wala sang local transmission nga matabo.
Ang tatlo ka mga security guard ang makabig nga low risk kun COVID-19 ang pagahambalan.
Tutukan sang Provincial Social Welfare and Development Office ang tuhoy sa psychosocial support program may kaangtanan sa suicide incidents sa probinsya sang Iloilo.
Alarming suno kay Defensor ang 30 ka insidente sang paghikog tuga sang depresyon kag iban pa nga rason.
Bangud sini, ginlakip na sa rehabilitation plan ang tuhoy sa paghatag sang bulig sa mga may mental health problems.
