ILOILO CITY – Pigado ang palangabuhi-an sang pumpboat operators sa Iloilo kag Guimaras bangud sa isa ka semana nga untat biyahe.
Ini ang kasunod sang natabo nga trahedya sa Iloilo Strait bangud sa malain nga tiyempo.
Sa interview sang Bombo Radyo kay Edward Castro, isa sa mga pumpboat crew, iya ginpahayag nga naga-agunto sila nga mga crew lakip na ang operators bangud nga wala sila sang kita sa sulod sang isa ka semana.
Suno kay Castro, mas makaluluoy ang ila tagsa ka pamilya nga nabilin sa Guimaras bangud nga magluwas nga wala sang income, apektado man ang ila nga pagbyahe patabok sa Iloilo.
Ginpahayag ni Castro nga ila gid nga ginapasalamatan ang ayuda nga ginahatag sang gobyerno.
Sa subong suno sa natungdan, nagapabilin sila sa Parola Wharf agud bantayan ang ila pumpboat kag nagahulat sang abiso sa pagbalik sang biyahe.
