‘Inday’ sa ‘TLC ni Inday’, wala nagatumod kay Mayor Raisa kundi sa mga benepisyaryo —spox

Ginklaro sang opisina ni Iloilo City Mayor Raisa Treñas nga ang “Inday” sa livelihood program nga “TLC ni Inday” wala nagatumod sa hayo sang alkalde kundi nagatumod sa mga benepisyaryo sang programa nga lunsay kababainhan.

Ini ang paathag ni Joy Fantilaga-Gorzal, spokesperson ni Mayor Treñas, matapos nga nagpadala sang complaint sa Department of the Interior and Local Government (DILG) ang isa ka abogado agud nga imbestigaran ang amo nga programa.

Ang TLC ni Inday nagakahulugan sang “Tindahan, Livelihood, and Cart ni Inday”.

Nagahatag ini sang seed capital kag iban pa nga material support sa mga benepisyaryo agud nga makasugod ukon makapaayo pa sang ila nga magagmay nga mga negosyo.

Sa complaint ukon report nga ginpadala ni Atty. Josiah David Quising kay DILG Secretary Jonvic Remulla kahapon, Mayo 28, ginmensyonar sini ang posible nga paglapas sa DILG Memorandum No. 2026-006.

Ini nga memorandum sang ahensya istrikto nga nagadumili sang paggamit sang pangalan, laragway, mottos, logos, color motifs, initials, ukon iban pa nga simbolo ukon graphic representation nga naangot sa sin-o man nga public official sa government projects kag signboards.

Base sa complaint ni Atty. Quising, ginsiling sini nga maathag nga naangot ang “TLC ni Inday” kay Mayor Treñas bangud hayo sini ang “Inday” kag amo ini ang iya nga campaign moniker.

Ginpahayag sang abogado nga ini nga proyekto ang halin man sa kuwarta sang taxpayers kag indi halin sa pulitiko.

Paathag naman ni Gorzal, ang “Inday” isa ka pamilyar nga pangalan gani nga amo ang nagahimo sang programa nga relatable kag accessible para sa mga pumuluyo.

Suno sa iya, Inday ang gin-gamit bangud babaye ang mga benepisyaryo.

Pahayag pa sini, halin sang nasuguran ang amo nga proyekto, masobra na sa 300 ka mga kababainhan ang nabuligan sa syudad.

“Ang Inday nagatumod sa beneficiaries sang sini nga programa. Ang Inday is a familiar local term that makes the program relatable kag accessible sa aton nga mga pumuluyo. Inday because babaye ang mga beneficiaries naton — babaye nga wala sang ila nga trabaho kag sila lang ang nabilin sa panimalay… That is actually the rationale sang program nga gina-implement sang PESO Office sang Iloilo City Government. Part ini sang women empowerment para mahatagan sang palangabuhian ang mga kababaihan sa aton nga sosyudad,” suno kay Gorzal.

Gin-athag ni Gorzal nga indi pa ini ang ila nga “definitive statement” samtang nga wala pa nila nabasa ang kabug-usan nga complaint bangud wala pa man sila napadal-an sang kopya. Sa subong suno sa iya, ang nabasa pa lamang nila amo ang nagalapta nga reports sa social media.

Nagpahayag si Gorzal nga sabton nila ini kun mabaton na nila ang complaint.

Nahibaluan nga sa report ni Atty. Quising, lakip sa ginhingyo sini sa DILG amo nga mag-conduct sang imbestigasyon sa amo nga proyekto; tumuron kun ang proyekto nagalapas sa DILG Memorandum Circular No. 2026-006; kag i-mandu ang gilayon nga pagkakas sang ukon ang correction sang non-compliant materials (kun may yara gid man).

Gindugang man ni Atty. Quising sa iya post nga mas importante nga talupangdon nga myembro si Mayor Treñas sang Mayors for Good Governance nga network sang local chief executives batok sa traditional politicking, gani nga daku gid ang expectation sang mga tawo sa iya kag sa amo nga grupo.

Nahibaluan nga nabaton na sang DILG ang amo nga complaint kag napasa na sa administrative team sang amo nga talatapan.#