Daku ang pagpati sang director sang Iloilo City Police Office (ICPO) nga indi “inside job” ang natabo nga pagpangransak sa Iloilo Supermart sa Barangay Tabuc Suba, Jaro, Iloilo City sang Agusto 27 kun sa diin P1.5-million ang nataban nga kantidad.
Sa interview sang Bombo Radyo kay Police Colonel Kim Legada, iya ginpahayag nga kun yara lang sa sulod ang kawatan, kuntani wala na ini nagpangabudlay sa pagpangkutkot sa alagyan.
“Kun inside job, daw indi man guro kinahanglan magpangabudlay sang amo to kalawig nga kutkutanay no? Maagi pa sa duha ka building, so para sa akon, daw kabudlay nga i-qualify naton as an inside job,” suno kay Legada.
Gindugang sini nga antes ang insidente, posible nga ginlibot pa sang mga suspek ang establisyemento agud nga mahimo sang maayo ang ila krimen.
Ginpaanggid man sang director sa istilo sang “termite gang” ang paagi sang mga suspek sa amo nga pagpangawat.
Ini base sa nakit-an nga kinutkutan nga buho nga nahamtang sa daan nga entrance sa sulod sang establisyemento kag amo ini ang ginalantaw nga posible nga gingamit bilang alagyan agud nga makasulod sa nasambit nga mall.
Ginabanta nga kaagahon ginhimo ang krimen kun sa diin naglabay sa drainage ang mga nagpangransak lapos sa ginbuhuan nila nga semento sa daan nga entrance.
Matandaan nga na-recover sang otoridad angg tatlo ka mga bara de cabra, lagari sang salsalon kag styro box sa drainage.
Sa Western Visayas, may kaangay man sini nga insidente nga natabo partikular sa Barangay Sum-ag, Bacolod City kun sa diin nag-agi man ang mga suspek sa drain canal sang Agusto 7.
Sang amo nga tion, naggamit ang mga suspek sang grinder, crowbar, hydraulic jack, kag bolt cutter para makasulod sa establisyemento, apang wala nadayon bangud namutikan sang security guard ang gahod sang kaagahon kag gintawagan sang pulis rason nga nagpalagyo ang ginaalegar nga gang members.
Sang amo nga tion, ginapatihan nga ang automated teller machine (ATM) ang target sang perpetrators bangud malapit gid ini sa area kun sa diin may cracks na kag posible nga amo gid ang agyan sang suspek.
Sang Agusto 19, may isa man ka separado nga insidente sa isa ka mall sa San Carlos City kun sa diin P1-million ang nataban sang duha ka lalaki.
Nakaagi man ang duha ka suspek sa buho sa salog sang mall kag nakit-an pa mismo sa surveillance cameras.
Diri sa Iloilo City, padayon pa ang imbestigasyon sang mga pulis. Daku man ang mabulig sang P500,000 nga reward money suno kay Legada para sa intelligence sang ICPO sa lokasyon sang mga suspek.
Sa sini nga kantidad, P250,000 ang halin kay Iloilo City Mayor Jerry Treñas, samtang P250,000 naman ang halin sa grupo sang local businessmen nga ginpaagi man sa opisina sang alcalde.##
