ILOILO CITY – Ginkwestiyon sang Iloilo City Public Safety and Transportation Management Office ang indi klaro nga ordinansa nga nagabutang sang restriction kag limitasyon sa mga salakyan nga nagalabay sa Buhang flyover.
Base sa ordinansa nga ginpasar sang Iloilo City Council, ang tanan nga salakyan nga may apat ukon masobra pa nga axles kag may karga nga 27 ka tonelada ukon masobra pa ang indi makalabay indi lang sa Buhang kundi mangin sa Hibao-an flyover nga tubtob subong, wala pa sa gihapon natapos.
Base sa ordinansa, ang tanan nga alagyan ukon taytay ang may maximum load capacities agud nga masiguro ang structural integrity sini.
Ang Public Safety and Transportation Management Office ang responsable sa pagpamuno sa pagpatuman sang ordinansa kag magapakig-angut sa Department of Public Works and Highways.
Ang mga salakyan nga madakpan nga magalapas sang ordinansa ang multahan sang P5,000 kag i-confiscate ang driver’s license.
Sa interview sang Bombo Radyo kay Mr. Jeck Conlu, ang pinuno sang talatapan, iya ginpahayag nga madamo sang nagareklamo sa iya bangud sa ginbutang nga tubo sa approach sang flyover.
Gin-athag ni Conlu nga indi ang syudad ang nagbutang sini kundi ang Department of Public Works and Highways Region VI.
Suno kay Conlu, may yara sang mga dalagko nga salakyan nga indi maka-agi sa flyover bangud sa tubo sa approach sini apisar nga wala man sang karga kag wala nagalab-ot sa 27 tons ang kabug-aton sini.
Pahayag niya dugang, ang ini nga dalan ang alagyan padulong sa international port gani dako ini kuntani nga bulig para sa mga truckings.
Ginpahayag man niya nga madamo sang nagakadisgrasya nga mga truckings sa idalom sang flyover bangud sa guba sa gihapon nga dalan nga suno sa Department of Public Works and Highways Region VI, indi pa mahingagaw kay-o subong nga tuig.
Ginkwestiyon man ni Conlu ang pagpatuman sang ordinansa bangud nga suno sa iya, wala sang traffic enforcers sa diin man nga bahin sang pungsod nga gina-deploy sa approach sang mga flyovers bangud tuman ka delikado para sa ila.
Gin-athag man niya nga sang gindihon ang ordinansa, wala sila na-imbitar sang Sangguniang Panlungsod.
Pahayag niya, kun nakabaton gid man sila sang imbitasyon, indi mahimo nga indi sila makatambong bangud kritikal ini nga ordinansa.
Una na nga ginpahayag ni Conlu nga wala man napahibalo ang iya opisina sang ginbuksan ini sang nagligad nga bulan sang Mayo.
