Indi magnubo sa 10 ka mga barangay sa Iloilo City ang nagpatigayon sang tagtaganay subong nga adlaw, Agosto 7, sang Assistance to Individuals in Crisis Situation (AICS) sang Department of Social Welfare and Development (DSWD).
Sa interview sang Bombo Radyo kay Teresa Gelogo, head sang Iloilo City Social Welfare and Development Office (CSWDO), iya ginpahayag nga nagalaom sila nga sa masunod nga semana, mahatagan na sang ayuda ang tanan nga pumuluyo sang syudad.
Suno kay Gelogo, ini bangud ‘urgent’ man ang pagkinahanglan sang tanan sang kwarta nga makapiyan-piyan sa adlaw-adlaw nga galastuhon.
Apang suno sa iya, bisan tayuyon na ang tagtaganay sang cash aid, indi malikawan ang pila ka mga isyu sa pila ka mga lugar kaangay sang naga-una pa sa pila sa pagkuha sang ayuda ang mga opisyal sang barangay sa baylo nga unahon ang ila nga pumuluyo.
Dugang pa niya, ginatinguhaan nila nga masolbar ang pila ka mga concern kag nagapangayo man sila sang kooperasyon sang tanan ilabi na sa pagsunod sang health protocols.
Samtang, para naman sa isa ka pumuluyo sang syudad nga nakakuha subong nga adlaw sang P1,000 nga ayuda, dako na ini nga grasya agud ibakal niya sang kinahanglanon sa sulod sang balay.
Sa interview sang Bombo Radyo kay alyas Bernadette, iya ginpahayag nga ika-apat na ini nga adlaw nga nagsirado ang kompaniya nga gina-trabahuan niya kasunod sang ginapatuman nga hard lockdown sa syudad.
Apisar sini, nagapasalamat na lamang ang natungdan nga may nabaton pa siya nga bulig nagikan sa gobyerno.
