Malapit sa 20 ka mga balay ang totally burned matapos nga ginlamon sang kalayo sa Barangay Magsaysay, La Paz, Iloilo City subong gid lamang nga hapon.
Sa interview sang Bombo Radyo kay Punong Barangay Gina Barrientos, iya ginpahayag sa inisyal nga listahan, yara sa 19 ka balay ang totally damaged, kon sa diin, kalabanan diri ang human sa light materials.
Suno kay Barrientos, kalabanan sa mga nasunog nga puluy-an ang ginapanag-iyahan sang province ang duta.
Nagpanawagan naman ang punong barangay sa publiko sang bulig agud nga mahatagan sang nagakaigo nga pagtatap ang mga nasunogan nga residente.
Nakatalana naman nga ipahamtang ang mga nasunogan sa evacuation center.
Suno naman sa pila ka mga residente, may nabatian lang sila nga may nagsinggit nga “sunog” rason nga napuwag kag gilayon sila nga nagkinaran-karan agud nga makaguwa sa puluy-an.
Nalab-ot naman sang kalayo ang isa ka motorsiklo rason nga nasunog gid ini.
Pasado alas-3:00 sang hapon sang natigayon nga mapalong sang otoridad ang nagluntad nga sunog.
Padayon naman nga gina-imbestigaran sang Bureau of Fire Protection (BFP) ang insidente agud nga matumod ang balor sang kahalitan kag kon sa diin naghalin ang kalayo.
