Ginsulong sang indi magnubo sa 50 ka mga fisherfolks ang ila nga Punong Barangay sa Sinapsapan, Jordan, Guimaras matapos nga wala sila sa gihapon nakabaton sang financial assistance nagikan sa AC Energy kaangot sa paglupok sang power barge nga nagresulta sa oil spill sa kalalawran sang Guimaras kag Iloilo sang Hulyo sang nagligad nga tuig.
Sa interview sang Bombo Radyo kay Antonio Villaluna, manugpangisda kag residente sang nasambit nga lugar, iya ginpahayag nga nakabaton sang kapin P8,000 nga ayuda ang ila Punong Barangay nga si Maribel Gersabalino kalakip na ang mga Barangay Kagawad sini apang suno sa iya, ang iban sa ila ang wala gid sang may nabaton sa diin ang iban naman, kapin P2,500 lamang ang nakuha nga ayuda.
Suno kay Villaluna, kaangay sang mga opisyal nila sa Barangay, palarehos lamang sila nga nakapasa sang mga rekisitos agud makakuha sang ayuda apang indi nila mahangpan kun ngaa wala sila ginapaathagan sang ila brgy. officials angot sa ginarelease nga cash assistance, sa baylo, ginpahog pa sila nga ireklamo sa pulis.
Depensa naman sang Punong Barangay sang Sinapsapan, Jordan, Guimaras, nagakadapat nga sa AC Energy magreklamo ang iya mga pumuluyo bangud wala man siya sang ihibalo angot sa pagsulundan sang kompaniya sa pagpanagtag sang ayuda.
Sa interview sang Bombo Radyo kay Punong Barangay Maribel Gersabalino, iya ginpahayag nga kaangay sang iya mga pumuluyo, nagtinguha man siya sa pagproseso sang mga dokumento nga kinahanglanon sa pagkuha sang cash assistance nga ginpasalig sang AC Energy.
Ginpaathag ni Gersabalino nga sang una pa lamang, wala siya nakapasalig sa iya mga pumuluyo nga makakuha ang tanan sang ayuda bangud ginapahayag nga ginapili lamang sang AC Energy ang ila nga benificiaries kag wala man nakahatag ang kompaniya sang lista sang iya pumuluyo nga mahimo makabaton sang cash assistance.
