Indi magnubo sa tatlo ka mga nagapapili Alkalde kag SB member sa Panay, gina-usisa na sang Philippine Army bangud sa paghatag sang pondo sa NPA

ILOILO – Gina-usisa na sa subong sang Philippine Army ang mga nabaton nga impormasyon nga may yara sang indi magnubo sa tatlo ka mga nagapapili alkalde kag sangguniang bayan members sa Panay ang nagasuporta sa kinahanglanon ukon nagahatag sang pondo sa mga rebelde nga New Peoples Army (NPA).

Suno kay 61st Infantry Batallion Commanding Officer, Lt. Col. Joel Benedict Batara, ang mga impormasyon nga ila nakuha ang nagikan man sa mga malapit nga tawo sang mga kandidato.

Dugang pa ni Batara, indi pa niya mahimo nga ipaguwa ang mga pangalan sang mga alkalde kag SB member bangud padayon pa ang ginahimo nga pagtipon sang ebidensya batuk sa mga ini.

Ginpasiguro naman sang Philippine Army nga hatagan nila sang igtalupangod ang mga impormasyon agud nga mauntat ang nasambit nga aktibidad.